السلام عليكم ،
أهلاً جميلاتي .. من طول الغيبات جاب الغنايم ؟ ان شاءالله
من زمان كنت حابة أتكلم عن تجربتي في الزواج والتجهيز والحفلة وكل شي بس مو عارفة بإيش أبدأ ..
المهم قررت أبدأ في تجهيز حفلة الزواج و تجربتي معاها بالتفصيل ان شاءالله تستفيدون منها
وبعدها بتكلم في بوست ثاني عن جهاز العروس وتجربتي الشخصية ..
أول شي .. ورقة وقلم وحددي أفكارك
إنتي وش حابة ؟
تختلف أولويات الناس وتختلف اهتماماتهم والأشياء اللي تسعدهم وبرضو ظروفهم
كل هذي الأمور خذيها بعين الإعتبار .. واعرفي إن أي شي ودك تسوينه بتقدرين المهم ذوقك يكون حاضر بيوم زي كذا
- حددي مكان الزواج بشكل عام ( قاعة - بيت )
- عدد المعازيم يتراوح من كم لكم ؟
- حددي ميزانية تقريبية تناسبك
- أولوياتك بالترتيب إيش هي ؟ فيه ناس أهم شي ديكور الزواج فيه ناس أهم شي المطرب فيه ناس أهم شي التصوير .. هالشي بيساعدك في تقسيم ميزانيتك .. شوفي انتي اهتمامك وشو ؟ وحطيها بشكل تسلسلي مثلا : ديكور - تصوير - شكلي - القاعة - مطرب - ضيافة .. الخ
الخطوة الثانية إبدأي إجمعي معلوماتك عن كل شغلة بالترتيب ..
مثلا بدأتي قائمتك بالديكور .. اتصلي على منسقين الزواجات اللي حابتهم وخذي أسعارهم التقريبية وسجليها
وكذا مع باقي الأمور ..
الخطوة الثالثة بعد ما اكتملت عندك المعلومات
قسمي ميزانيتك بناء عليها .. وطبعا بتستفيدين من قائمة الأولويات ان لو كان الديكور بالنسبه لك أولوية فبتهتمين فيه زيادة وتحطين عليه .. أما لو كانت الأولوية للقاعة نفسها فالعكس .. أتمنى وضحت الفكرة
الخطوة الرابعة إبدأي بالحجوزات ..
راح اكتبلك قائمة احتياجات حفلة الزواج التقليدية .. وأفصل فيها وأعطيك نصايحي ..
- قاعة ( أو مكان الزواج )
- ديكور
- مطرب ( أو الفرقة )
- استديو تصوير
- ضيافة
- كروت الدعوة
- صبابات و خدمة
- شكلك ( فستان و شعر وميك اب )
- الزفة
- بخور للصبابات
- كيكة الزواج
- إضاءة للقاعة ( مو أساسي )
- شاشات عرض ( مو أساسي )
- توزيعات خاصة ( مو أساسي )
- عطور خاصة لبعد العشاء ( مو أساسي )
نبدأ بأول شي اللي هو مكان الزواج :
لو كان بيت بنختصر هالفقرة
لكن لو كان قاعة
اختاري حسب ميزانيتك ومعازيمك و ذوقك وهل هي تناسب الديكور اللي ببالك أو لأ
اهتمي بإنها تكون شرحة و سقفها عالي لأنه بيطلع الديكور أجمل ومنظر أشرح للقاعة
بالنسبة لي اهتميت انها تكون أوتيل لأني أحس بيكون لهم ستاندرد معين للخدمة والعشاء وكل شي
و كنت أبي سقف عالي و يكون سقفها تقريبا ساده لاني احس لما تكون زحمة بتخرب على ديكوري .. طبعا مو شرط كلامي أحسن شي بالنهاية كل وحدة واللي تحبه ..
المهم اني اخترت الكمبنسكي
وصراحة حبيت تعاملهم وخدمتهم
حبيت شكل القاعة وحجمها و برضو المدخل حقها والحمامات
وجناح العروس و العشاء .. كله كان تمام التمام
لما تختارين القاعة اتصلي خذي التواريخ اللي متوفرة فيها
واحرصي تبدين بهالشي بدري عشان تلقين بالوقت اللي تبينه
نروح لثاني شي اللي هو ديكور الزواج :
بعد ما جمعتي معلوماتك وحصرتي خياراتك زوري المنسقين المناسبين لك وابدي تناقشي معهم بالديكور اللي تبينه خصوصا بعد ما اخترتي القاعة
فكري وقارني و اختاري بينهم ..
نصيحتي لك اذا تقدرين تسلمين منسق الديكور كل أمور الحفلة سوي كذا
خصوصا اذا كنتي مقتنعة في ذوق شركتهم .. بالنهاية هم عندهم خبرة بهالمجال وهالشي بيريحك كثير
لأن في اشياء تاخذ من وقتك و انتي في فترة تجهيز
زي الصبابات وبنات الخدمة و الضيافة والكيكة
أشوف من الأفضل توكلين هالمهمه لشركة الديكور لأن هم لهم تعاملات مع ناس معينه يرتاحون معهم أكثر
وغير كذا الأسعار لهم آفضل بكثير من لو انتي رحتي بنفسك
هم عملاء دائمين ..
بالنسبة لي تعاملت مع وردة الحفل ( سارة آل الشيخ ) وكنت راضية عن الزواج بنسبة ٩٠٪
سلمتها ديكور الزواج ( طبعا اختياري كل شي .. زرتها أكثر من مرة واتفقنا على كل الأمور )
و الضيافة والصبابات والخدمة و مسكة الورد
وكلهم كانو تمام
الخطوة اللي بعدها وهي اختيار المطرب أو الديجي:
أرجع وأقول شوفي انتي وش يناسبك ؟ والخيارات كثيييييييرة و حتى الأسعار فيه اللي يناسب كل الميزانيات
انتي جمعتي المعلومات وسجلتيها احجزي اللي ناسبك ولو قدرتي تسمعين لهم قبل أفضل
بالنسبة لي اخترت في بداية الزواج ( نواف الصالح ) لحد بعد الزفة بشوي .. بعدين جت المطربة أحلام
وكانت الخيارات ناجحة الحمدلله ..
استديو التصوير :
ترا هالموضوع مره مره مهم ولا تتحسفين فيه أبد .. لأن شفتي كل التجهيز اللي قبل ؟ ما راح يبقى منه الا الصور
أحس لو يرجع فيني الوقت بتعامل مع مصورة سعودية .. مو عشان اللي اخترته ماعجبني بس حسيت نظرة السعودية في الكاميرا زي اللي أبيه بالضبط أحس مهما كان احنا نفهم على بعض وش نبي
انا اخترت استديو بنات .. وكانت التجربة ناجحة بس مع بعض الملاحظات
( يمكن أنا أدقق بزياده ) عموما التصوير كله حلو لكن اللي ما حسيته مرضي بالنسبة لي هو مونتاج الفيديو
لكن للأمانه هم مستعدين للتعديل وكان فيه فرصة بس أنا مارحت
الشي اللي بنصحكم فيه لو الميزانية تسمحلك .. لا تفوتين التصوير السنمائي ( الكاميرا الكرين )
فرررررررررق عن التصوير العادي بمراحل بحكم اني جربت الاثنين .. حتى لو كنتي ماراح تصورين الا نفسك والكوشه برضو فرق كبير .. الكرين أثبت وأوضح وتوريك الصورة كاملة وتعيشك جو الزواج من جديد
الضيافة :
تتقسم على حسب معازيمك حالي و مالح و حلا عصير يتقدم بعد الزفة
استشيري منسق زواجك عن الكمية المناسبة
عن نفسي زي ما قلت لكم وكلت المهمة لمنسقة الزواج وارتحت وكانت حلوة مرة
كروت الدعوة :
اختاري شي يمشي مع ديكورك أو ثيم زواجك .. ممكن تتعاملين مع محل أو مع المطبعة مباشرة
أنا تعاملت مع محل بس لو يرجع الوقت اتعامل مع المطبعة
لأن المحل مجرد وسيط فالأفضل انتي تتواصلين معهم بنفسك السعر بيكون أحسن و التعديل أسهل
صبابات وخدمة :
الشي اللي انصدمت فيه اول كنت احسب الصبابات من نفس القاعة! طلع حجزهم شي منفصل ..
اسألي قاعتك عن أرقام هم يتعاملون معهم دايم لأن كذا بيكونون الصبابات وبنات الخدمة متعودين عالقاعة ومتمكنين منها
و اختاري لبس لهم يكون مناسب للديكور
طبعا انا سلمت المهمة لمنسقة الزواج بعد ..
شكلك :
والكلام هنا يطوووول شرحه بس بحاول اختصر
أول شي احجزي ميك اب و شعر واضمنيهم
بعدها ابدأي دوري على الفستان .. قيسي أكثر من موديل وتصوري فيه وارجعي فكري وش اللي طلع عليك أحلا ؟
تختلف وجهات النظر فيه ناس تفضل جاهز وناس تفضل تفصيل
عن نفسي أشوف الزواج ما يحتمل المغامرة .. الجاهز أريح لبالك و أضمن
وممكن انتي تضيفين عليه لمساتك بس المهم الأساس مضمون
أخذت فستاني من bridal couture boutique مكانهم بالعليا ولهم حساب عالإنستقرام
كان سترابلس و أضفت عليه أكمام أوف شولدرز تل و حطولي عليه من نفس الورود اللي عالفستان فطلع منه وفيه
والطرحة أضفت كلفة مطرزة بدايتها .. نفس البوتيك يعدل لك اللي تبينه
ممكن الفستان ترسلينه لهم ليلة الزواج يكوونه بس احتمال انه يرجع يتعفط وارد مع الشيل والحط
ف لو عندك مكواية بخار يفضل تاخذينها معك للقاعة وينكوا هناك
نصيحة لك لا تبدعين بشكلك عشان لما تمر سنين وتشوفين صورك ما تكرهينها .. خلي شكلك كلاسك
الزفة :
اختاري شي يعنيلك وتحبينه .. عدلي عليه وخليه مميز خاص فيك .. والمهم تكون تعبر عن فرح
زفتي كتبها الوالد الله يحفظه و غناها ماجد المهندس والحمدلله طلعت حلوة
حان وقت القصيدة والمشاعر مهر
والليالي غيورة من بهاكي تغار
اقبلي مثل صبحٍ يحتويه الزهر
خطوتك هيبة الدنيا بعين الوقار
إن مشيتي جمال الكون كله حضر
وان وقفتي يذوب الصمت والإنتظار
عند بندر كتبك الله وزان القدر
جاد حظه وزان بحظك الإختيار
فوق غيم المراجل يوم بندر شهر
عنده الطيب في الدنيا دليل وشعار
وانتي أول العمر يا اغلا ليالي العمر
والله انه يحق لمثلي الإفتخار
كيف أوصف حلاك وكيف أبكتب شعر ؟
والحلا فيك فوق الوصف والإنبهار
في عيونك نجوم وفي عيونك قمر
في جديلك سواد وفي مسارك مدار
يالبشاير عسى ربي يديمك دهر
في سعادة ليالي وابتسامة نهار
والقصايد بوصفك من إحساسي مهر
من يلوم الليالي لو بحسنك تغار ؟
.
ولا تنسين سي دي سورة البقرة تشغلونها بالقاعة بنفس اليوم أو الرقية الشرعية
بخور الصبابات :
ما تحتاج شرح ، البخور اللي تحبونه جهزوه معكم تاخذونه القاعة يبخرون فيه الصبابات ..
كيكة الزواج :
فيه ناس تتكلف فيها مرة مره وناس وسط وناس ما تعني لها فتخلي نفس القاعة تسويها مع البوفيه
عن نفسي أميل للوسط مو كثير كثير اهتم لها
فاخترت شوقر سبرنكلز ضبط لي الشكل اللي ابغاه وخليت طبقة وحدة كيك بس
اما الباقي فلين عشان حرام ما تنوكل
إضاءة القاعة و الشاشات :
هالشي اختياري واضافي لكنه يعطي شكل جميل للقاعة وللتصوير
أنواعه كثير وأسعاره تتراوح
بالنسبه لي اخترت اللي تتعلق بالسقف فوق ممر الزفة كامل .. اعتقد اسمه بردج
وبرضو هذا سعره يختلف حسب طول اللي خذتيه
ينور مع العروس كل ما وصلت مكان ينور بس فوقها .. ممكن تستفسرون عنه من منسق ديكور الحفلة أو تكلمين مباشرة مسؤول اضاءات
هو مكلف ف ممكن لو صادف قبل يوم زواجك زواج ثاني مستخدمينه ممكن تتفقين مع مسؤول الإضاءة تستأجرينها بنص السعر
والشاشات بعد نفس الحكاية .. طبعا شاشات مش البروجكتر لا لها اسم ثاني نسيته المهم إنها أوضح كأنها تلفزيون كبير مرة تنقل زفة العروس و المطرب أو العرس مباشر
برضو تعتبر اختيارية و تستأجرينها من منسق الزواج أو مسؤول اضاءة وشاشات
و بعد ممكن تستأجرينها بنص السعر لو كان فيه زواج قبلك بيوم
توزيعات الزواج :
اختيارية ومو كل الناس تحبها وتقدمها وفيه ناس يفضلونها .. بالنسبه لي ما اقدر افيدكم فيها
لأني احترت فيها وماحطيت شي .. بس لو عندكم افكار اكتبوها بالكومنتس عشان يستفيدون البنات
عطور خاصة لبعد العشاء :
ممكن يوفرها لك منسق الحفلة .. عن نفسي أخذتها من حساب انستقرام يعبي عطور مشهورة في علب ثانيه مطبوع عليها إسم العروس والعريس
كانت حلوة مره خصوصا اني احتفظت فيهم بعد الزواج وخليتهم عطور مغاسل
اسم الحساب كان Lunaire
.
خلصنا من أغلب أمور الزواج ان شاءالله مانسيت شي .. وهذي نصايح عامة
- قبل الزواج بيوم احجزي مساج لك ولأمك وخواتك .. بيفيدكم خصوصا ان لكم فترة متوترين .
- لاتنسين أذكارك يوم الزواج وحاولي تقرين البقرة أول ماتقومين أو تسمعينها عشان تهدي أعصابك .
- يوم الزواج كثير ناس بيخدمونكم .. ناس بياخذون آلاف مؤلفة وناس ميات وفكة .. طلعي للمحتاجين من اللي خدموكم صدقة .
- اتفقي مع شركة تاخذ فائض العشا والضيافة .. مثلا أشهر شي شركة إطعام .
- لا تزعلين اذا ما مشى شي حسب ما خططتي له وانبسطي بيومك .. مهما كان الكمال صعب والناس بذلت كل جهدها لكن النقص وارد .. استمتعي وشوفي الزين والإيجابي .
- استغفري وحوقلي وادعي ربك بالتيسير وتوكلي .
- خذي وقتك بالتصوير ولا تعجلينهم لأنك تعبتي .. بالنهاية هو يوم واحد والصور ذكرى جميلة .
- حاولي تجهزين بدري عشان تخلصين تصوير بدري و تنزفين بدري وتقعدين أكثر وقت في زواجك .
- سوي مود بورد لشكلك يوم الزواج عشان تتخيلينه كامل .. المود بورد يعني تجمعين صور تقريبية للي ببالك جنب بعض بصورة وحدة او لوحة عندك .. انا استخدمت جوالي وجمعت صورة لفستان قريب من فستاني ومسكة ببالي وميك اب وشعر وهالشي ساعدني اني اتخيل الطلة كاملة .
وبس ان شاءالله كان بوست مفيد وغطيت فيه أغلب جوانب حفلة الزواج
والله يوفق العرايس ويسعدهم ويتمم عليهم وعقبال العاوزين يارب ..
قولولي عالأشياء اللي حابين اكتب عنها بعد بالبوست الجاي ( جهاز العروس )
