للنحيفات : كيف أزيد وزني ؟

كيف أزيد وزني ؟

السلام عليكم ،

مشكلة النحف الزايد مشكلة يعاني منها بنات كثير .. والاسباب تختلف فيه ناس أكلها قليل فيه ناس مرو بمرحلة خلتهم ينحفون سواء نفسيا أو مرض أو بريسز و بعدها ثبت وزنهم و فيه ناس وراثة و طبيعة جسم .. 

أول شي اللي بقوله لكم اني مريت بهذي المرحلة و الحمدلله نسبياً تعديتها .. مازلت تجيني فترات انحف فيها لكن عرفت كيف اتدارك الموضوع

في البداية لازم تعرفين وزنك بالنسبة لطولك و كم كيلو تحتاجين عشان توصلين للوزن المثالي .. هذا الموقع بيساعدك :

http://www.moh.gov.sa/HealthAwareness/MedicalTools/Pages/IdealBodyWeight.aspx

( احيانا يكون وزنك مثالي يعني صحي .. لكنك شكلاً حابة تزيدين وزنك كم كيلو هذا عادي ما يعتبر انك فوق المثالي لان المثالي عبارة عن اكثر من ٥ كيلو)

ثاني شي لازم تعرفين انتي كم تحتاجين سعرة حرارية باليوم عشان يبدأ وزنك يزيد .. وكمان هذا الموقع راح يساعدك :

http://www.moh.gov.sa/healthawareness/medicaltools/pages/caloriecalculate.aspx

السعرات اللي تطلع لك هي اللي تحتاجينها يوميا .. فلازم تزيدين عليها عشان وزنك يبدأ يزيد

بعد كذا ابدي بتنسيق الأكل و الوجبات .. دوري كل اللي سعراته زيادة لكن حجمه صغير وما يشبعك .. مثلا الزيتون! ضيفي لأكلك زيتون لأنه سعراته كثيرة و حجمه صغير .. فهمتي الفكرة؟

كمان فيه شي مره ساعدني على زيادة الوزن و هو حليب جالاكسي الكاراميل .. كنت أشربه عالريق قبل الفطور و بالليل قبل لا انام و بانت النتيجة بأسبوعين

روحي السوبرماركت وجيبي كل شي تحبينه .. نسقي الأكل الصحي و خلي شكله يشهي عشان تاكلينه كسناك .. جيبي صوصات للسلطة و خبز وتشيز و بدليها عن التشبس والخرابيط .. سلطة الفواكه كمان مره مفيدة و فيها سعرات

ابدي بالطبق الرئيسي بعد كذا تسلي بالسلطة .. رشي عالسلطة زيت زيتون و جبنة مبشورة مثلا بارميزان .. كمان عالمكرونة رشي عليها جبنة

حاولي صحنك يكون فيه بروتين .. بدلي الزيت بالزبدة  

بين الوجبات حاولي تاكلين كوكيز او كيك او حلا مع قهوة

حاولي تجمعين بين عناصر الهرم الغذائي بصحنك او عالاقل خلال اليوم

كمان المكسرات فيها سعرات .. خليها جمبك وانتي تتفرجين تلفزيون ولا عاللاب توب 

و فيه طريقة نصحتني فيها أمي لأنها كانت زيي من زمان وفعلا طبقتها مره تفيد .. وهو انك لما تخلصين أكل وتوصلين مرحلة الشبع اللي خلاص ما عاد تقدرين تاكلين .. اغصبي نفسك على لقمتين زيادة.. بهالطريقة معدتك تبدا تتوسع وتطلب أكل أكثر ( أعرف ان هالطريقة مو صحية أبد لكن هي مو نظام حياة هي فترة زيادة الوزن بس )

اذا جعتي على طول شوفي شي تاكلينه لا تتاخرين بالوجبات

كمان بالنسبة لفواتح الشهيه ما انصح فيهم ابدا ما يفيدون ويجيبون الكسل و الخمول! أحسن شي الملتي فايتمنز تفيدك وتفتح شهيتك بنفس الوقت

و بنات انا اكتشفت ان لخبطة النوم هي أهم عوامل النحف و لخبطة الوزن لانك تقومين بوقت مافيه اكل و تاكلين اشياء مو مفيدة و ما تسمن ابد و تظلين يوم كامل على وجبة وحدة فحاولي تنظمين نومك وتحرصين على وجبة الفطور لانها هي اللي تفتح شهيتك باقي اليوم

الحركة و المشي والرياضة جدا يساعدون على زيادة وزنك اهم شي اعرفي الرياضة المناسبة او اكتفي بالمشي

اخر شي .. لا تأزمين نفسك وتفكرين بالموضوع كثير لانه هذا الشي يمنعك ان وزنك يزيد .. عيشي حياتك و اعرفي انك حلوة بكل حالاتك و الناس تختلف هي مسألة كم كيلو و تقدرين تزيدينهم بدون توتر و اكتئاب ❤️

اتمنى يكون البوست فادكم ولو بشي بسيط ❤️