السلام عليكم
أهلا جميلاتي .. بوست اليوم مختلف عن كل مرة بدل الصور و الفاشن هالمره بسولف شوي معكم
من زمان حابه أبدأ هالموضوع من كثرة الأسئلة و الرسايل اللي تجيني فقررت راح أبدأ أكتب كل فترة و الثانية بوست أتكلم فيه عن شي معين .. كلها راح تتمحور حول الثقة و الإيجابية و الحياة بشكل عام
واليوم البوست خصصته عن الثقة بالنفس
في بنات يكتبون لي بالآسك كيف أقتنع إني حلوة ؟ كيف أثق بنفسي ؟ أستحي أتكلم مع الناس .. و الى آخره
بنات أول شي حابه أقوله لكم .. كل شخص في هذي الدنيا عنده مشكلته ( صدقيني ) !
مافي أحد كامل .. فيه ناس واثقين أكثر و ثقتهم انعكست عليهم بالتالي صرتي تحسينهم أحلا و أكمل
وصدقيني اذا انتي تجاهلتي عيب معين الناس بتتجاهله معك و لو اقتنعتي بنفسك الناس بتقتنع فيك
ثاني شغله خذي أول خطوة مع نفسك و إجلسي جلسة صراحة .. أنا إيش عيوبي و إيش مميزاتي ؟
اكتبيهم بورقة وقلم واحد اثنين ثلاثة..
إبدأي بالعيوب و حطي خطة لعلاجها
مثلا ..
المشكلة : وجهي فيه حبوب
الحل : راح أحجز موعد مع دكتور الجلدية و ألتزم بكورس علاج - راح أنظم تغذيتي
المشكلة : أرتبك بالكلام قدام الناس
الحل : راح أجرء نفسي و أقرا كتب تطوير في التعبير و الخطابه - راح أتدرب قدام المرايه
وهكذا ..
بعدين نروح جهة المزايا و تفكرين كيف تبرزينها .. وتركزين عليها وتطورينها سواء كانت داخلية أو خارجية
ثالث مرحلة وهي إنك تشتغلين على شخصيتك وثقافتك .. ارسمي الشخصية اللي حابه تكونينها وخططي لها
اختاري مميزاتك و حاولي تتغلبين على عيوبك
لا تكونين وحده عادية لأن ربي خلقك مختلفة ومميزة .. خلي اللي يعرفك ما ينساك
صدقيني جمالك الداخلي هو اللي بيزيد الثقه وبيمتنها
بالنهايه الحياة أقصر من إنك تضيعينها بدون ثقة بنفسك
لا عمرك تخلين ثقتك تهتز من كلام أحد أو نظرة أحد لأن عين الناس اللي تنتقد ناقصة و تعبر عن نقص داخلي في شخصيتهم و حتى ثقتهم! ببساطة كوني إنتي بمزاياك و باختلافك عن الجميع
اعرفي انك غير و انك ودك تجربين كل شي! جربي اللي تخافين منه .. جربي اللي ولا مره سويتيه
ولا تخافين تفشلين حتى لو كان هذا الشي لون ماتعودتي تلبسينه! دوري على جوانب بشخصيتك ماعمرك قربتي لها
ورددي بينك وبين نفسك .. أنا ذكية أنا جميلة أنا أنيقة أنا مختلفة أنا ناجحة
لأنك فعلا كذا وقت ما تقررين .. و أبدا مو كذا وقت ما تشكين بنفسك
مثل نردده بدون ما نفكر ( واثق الخُطى يمشي ملكاً ) فعلا !
اجتهدي تكونين الشخصية اللي تتمنينها .. و ادعي بصلاتك دايما ( اللهم اجعل سيرتي حسنه بين خلقك و حبب فيني عبادك الصالحين وسخر لي .. اللهم كما أحسنت خَلقي فأحسن خُلقي )
و حطي ببالك ان الموضوع أسهل من ما تتوقعين ..
أتمنى كل وحدة تكتب لنا كلمه بخصوص الثقه بالنفس .. ايش هي الثقه برأيك ؟ وكيف الوحده توصل لها ؟
شكرا و أحبكم
Eleganza
كلامك صحيح 100%
ردحذفالشخص لما يحط في باله انه جميل راح تزيد ثقته في نفسه و يكون فعلاً جميل بثقته
الثقه تكون بقناعة الشخص بنفسه وراضاه بكل شي فيه و عنده ما يشوف اللي اعلى منه و يحطم نفسه ليش انا ماعندي و ليش انا مو كذا هذا راح يقلل ثقته بنفسه لكن لما يحط هذا الشخص قدامه و يقول راح اكون احسن منه و يجتهد كذا يكون واثق في نفسه
و شكراً لك
كلام رائع....
ردحذفيقولك مثلي انك واثقه من نفسك تلقائيا مع الايام بتصيرين واثقه من نفسك يأثر عليك داخليا لول
كلام جميل ��
ردحذفأنا من رأيي ان اقوى سبب يحطم ثقة النفس هو لما البنت تقارن سلبياتها بايجابيات البنات
وما تحاول تبرز ايجابياتها بالعكس تقعد تحاول تبرز سلبياتها لما تحس ان حتى ايجابيتها مب زينه
... فكره جميله انك تتكلمين عن اشياء تزيد ثقة البنات -الله يوفقك-